Mo lamour pou de fam
Lesiel dan so grander inn met rob dey
Soley inn kasiet so figir ek enn vwal latristes
Divan inn azenou san okenn lorgey
Lanatir an bern devan zot sazes
Menm laklos legliz refiz fer gran tapaz
Bann zwazo dan lesiel rekont zistwar zot lavi
Zordi lepep perdi de so pli gran fidel ek saz
Zot lamor enn selebrasion zot lavi
Diskre, senp parey kouman zot ti vini zot ine ale
San dir nanrien san deranz personn
Zot inn viv, donn lavi avek tan zenerosite
Zot lamitie dan lavi dan lamor pa inn disipe
Parey enn labriz san okenn tapaz
Plis enn partaz
Zot inn fer sakenn enn kado
Zot zanfan, zot vilaz, zot pei
Enn sourir, enn zenerozite, san mezir
Zame san enn ti mo Lankourazman
Temwanyaz zot parkour dir tou lor zot karakter
Fam kouraz, fam lakaz, fam saz
Fam fidel zisko bou ek zonm ek Bondie
Zordi mo selebre lamour ki mo enan pou de fam : Didi ek Yenn.
